Hitz egin dezagun!

Merkatari gisa, badakigu bizi dugun egoera zailaz  jabetzen zarela. Ez da gauza berria, urte asko daramatzagu borrokan urtez urte mehatxuak gehitzen zaizkion merkataritza-eredu bat salbatzeko. Azalera handien hedapenak eta, oraintsuago, Internet bidezko erosketen orokortzeak, kontsumo-moduak eta gure kaleen itxura aldatzen ari dira. Horrek eragin zuzena du gure herri eta auzoetako bizitzan, harremanak izateko moduan, gizarte ereduan.

Guk argi dugu dendak behar ditugula, merkatariak behar ditugula. Dendariak behar ditugu arreta emateko, gurekin egoteko, gure herri eta hiriei bizia emateko. Ez dakigu nolakoa izango den etorkizuna, baina etorkizun horretan saltokiak nahi ditugu, denda irekiak, zu bezalako merkatariak.

Ez beldurtu. Elkarte batean parte hartzea ez da hainbesterako. Merkatari asko dagoeneko egiten ari diren borondatezko lana da, eta guztion mesederako da. Bide horretan, laguntza pixka bat asko da.

Gure elkarteetan, gainera, parte hartzeko modu desberdinak daude, eta zure aukeretara edo momentura gehien egokitzen dena aukeratu ahal izango duzu.