Denok Batek kanpaina berezi bat jarri du abian abuztuaren 12ko eguzki-eklipsea dela eta. Ekimenari esker, fenomenoa segurtasunez ikusteko betaurreko homologatuak doan eskuratu ahal izango dira federazioari atxikitako saltokietan, izakinak agortu arte.

Kanpainaren helburua da aparteko gertakari hau tokiko merkataritzan erosketak sustatzeko baliatzea, bezeroekiko harremana indartzea eta opari erabilgarri, sinboliko eta gogoangarria eskaintzea.

«Eklipsea zure saltokitik pasatuko da» lelopean, Denok Batek herritarrak parte hartzen duten establezimenduetara hurbildu eta betaurrekoak jasotzera gonbidatzen ditu. Horrela, dendak udako hitzordurik berezienetako bat elkarrekin prestatzeko eta bizitzeko topagune ere bihurtuko dira.

Ekimenak gogorarazi nahi du tokiko merkataritzak ez dituela produktuak eta zerbitzuak soilik eskaintzen. Esperientziak sortzen ditu, harremanak sendotzen ditu eta herrietako eguneroko bizitzan aktiboki parte hartzen du. Oraingoan, erosketa bakoitza komunitate osoak partekatuko duen une paregabe baterako sarrera izan daiteke.

Gainera, Denok Batek betaurrekoak jasotzen dituzten pertsonak haiekin argazkia egitera eta irudia federazioari bidaltzera animatzen ditu. Eklipsearen ondoren, jasotako argazkien aukeraketa bat sare sozialetan argitaratuko da, fenomenoa udalerri eta herri desberdinetan nola bizi izan den erakusteko.

Bigarren fase horri esker, kanpainak abuztuaren 12tik harago jarraituko du, eta zerura begira egon diren merkatari, familia, lagun-talde eta bezeroen irudiekin kontakizun kolektiboa osatuko da.

Eskuratu zure betaurrekoak doan Denok Bat-eko saltokietan, izakinak agortu arte.

Eta gero, jantzi betaurrekoak, atera argazkia eta bidali guri. Gure sare sozialetan partekatuko dugu.

IKUSI PARTE HARTZEN DUTEN SALTOKIAK

Nafarroako Gobernuak diruz lagundutako jarduera.